Saeed khan is famous urdu poet.He wrote many urdu ghazals and nazams.Here you reed all his beautifull and new urdu poetry
ہم نیک سے کم تھے نہ کسی بد سے زیادہ
بس عشق میں بدنام ہوئے حد سے زیادہ
یہ محفلِ آشفتہ کہاں راس تھی دل کو
جی آگیا اس شخص کی آمد سے زیادہ
کچھ سوچ کے لایا ہوں میں دل نوکِ زباں تک
کچھ کہنا پڑے گا تجھے شاید سے زیادہ
مقصود ہے گر ترکِ وفا جانِ گریزاں
کر ظلم کوئی غفلتِ سرزد سے زیادہ
جو کچھ ہے کسی صحبتِ زیبا کا اثر ہے
میں خال ِ سِوا ہوں نہ کہیں خد سے زیادہ
بے کار میں دیوانہ کہے جاتی ہے دنیا
بس چاہیئے اک شخص مجھے حد سے زیادہ
جانے کسی تحریک میں نکلے تھے گھروں سے
پھر لطفِ سفر ہو گیا مقصد سے زیادہ
ہم نے اسے نزدیک سے دیکھا تو کھُلا ہے
اس حُسن کی قامت ہے کہیں قد سے زیادہ
اس دل میں ترا دھیان یا مسجد میں اذاں ہے
میں گونج رہا ہوں کسی گنبد سے زیادہ
کس منہ سے مگر دیجئے ماحول کا پُرسہ
سائے کا ہمیں رنج ہے برگد سے زیادہ
گر بھیک سُخن کی درِ مولا سے عطا ہو
افضل ہے مجھے شاہ کی مسند سے زیادہ
SaeedKhan
غزل
خوشا کہ محفلِ عرق و ایاغ روشن ہو
ملے ہیں یار تو شامِ فراغ روشن ہو
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بھڑک رہی ہے سبھی جا ہوس لکیروں میں
کہیں تو جادہِ دل کا سُراغ روشن ہو
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
میں تھک گیا ہوں ستارے کشید کرتے ہوئے
خدائے شب مرے سینے کا داغ روشن ہو
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کبھی تو یوں بھی شبِ ہجر مجھ کو راس آئے
میں تجھ کو یاد کروں اور چراغ روشن ہو
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جنوں کے سینے میں رکھا ہے آگہی کا گُہر
کھُلے نہ عشق تو کیسے دماغ روشن ہو
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بہارِ لالہ و گُل مضمحل ہے مدّت سے
وہ ماہ رُخ اِدھر آئے تو باغ روشن ہو
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
میں روشنی کی وہ تعبیر لکھ رہا ہوں جہاں
ہوا کا ہاتھ پکڑ کر چراغ روشن ہو
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نہ کارِ دل ہی سکوں ہے نہ کاروبار سعیدؔ
کہاں سے گھر مرے شمعِ فراغ روشن ہو